بِسْم الله الرحمن الرحيم
الاخوه الاعزاء اعضاء وزوار مجالس البدارين الدواسر
السلام عليكم ورحمة الله وبركاته وبعد
احببت اضع بين ايديكم
قصيدة الشيخ والشاعر المبدع : أحمد محمد الجردان
في لقاء أسرة المهوس البدارين الدواسر
في استراحة إشبيليا ببريدة
١- يا سلام الله سلام ن بريده
من جلاجل جيت وشوقي يزيده
٢- مشي رِجلي مِير شوقي سبقني
العجب كل العجب يا بريده
٣- ساقني شوقي وانا امشي و لا ادري
رِجلي تمشي حيث قلبي يريده
٤- جيت يَمّك يا بريده أسلم
والغلا مني كتبته قصيده
٥- للذي هم لابتي وتاج راسي
المهوّس كاسبينَ الحَميده
٦- هُم بِني بدران شيخَ الدواسر
هو ضمين ن والخلايق شهيده
٧- والعصا لا من وسمها
فلا بد
يَامنَ اللي خايف ن من طريده
٨- محزمي هُم عزوتي عيال جدي
وحبهم بالقلب مجرى وريده
٩- هُم رجال ن والمراجل مواقف
وللوطن حامين ويِّا العقيدة
١٠- هم بُناةُ وبالمعالي علالي
هم دُهاةُ وبالمواقف وليده
١١- هم هَلَ الطولات وأهل المكارم
كاسبينَ الطيب قِدم وجديده
١٢- أربع حروف ن كستها الفضايل
جَمعها ( مهوّس ) وخذها فريده
١٣- ( مِيمها ) مجد ن وذكر ن توالىَ
بحولنا وأقصى الديار البعيده
١٤- و ( هاؤها ) هامة شموخ ن تباهت
بالمراجل والعلوم المجيده
١٥- و ( واوها ) وقفات عز ومفاخر
ومن نصاهم حققوا ما يريده
١٦- و ( سينها ) سِم ن سقوه الآعادي
وباسهم بالحرب ناره وقيده
١٧- والتقينا اليوم وعز ن لقانا
وفي ضيافتهم فَرحنا يزيده
١٨- شوفةَ اللي كاسبينَ الجمايل
لابتي أهل العقول الرشيده
١٩- آلِ بدرانَ الدواسر تراهم
في عُلا مجد ن تزايد رصيده
٢٠- والختم صلّوا على خير مرسل
عِد ما مرت سنين ن مديده
– أبو بدران –
أحمد بن محمد الجردان
جلاجل – سدير
الجمعة ١٤٣٧/١١/٢
