القصيدة توضح (حالة الشعر) في زمن كثر فيه المستشعرون
في زمن خلط المشاعر ف الشعير
حضرة المستشعرين ابلا شعر
جيت ادور ف القصايد شكل غير
ولا لقيت اللي بها ارد النظر
المليح شوي والسامج كثير
والسماجه عيب والذربه ظفر
مكثر اهل الشعر ف الجمع الغفير
ولو فحصت الجمع ماتلقى نفر
وين بلقى شاعرً فكره كبير
مايسوق من القصيد الا البكر
كم شاعر جاك يشعب له بعير
والبعير عوير والشاعر عور
كيف الوم الوزن ف البيت الكسير
في زمان المبتدأ عود خبر
ياعذاب الشعر والبحر الغزير
من سبابيح البحر ضاق البحر
الشعر ذا الوقت في وضعً خطير
ياشقى الاوراق من لون الحبر
المعاني سلكها زي الحرير
بس فيها نقطه وخط حمر
فيها خف بعير مع جنحان طير
وفيها شعرة ذيب مع مخلب صقر
والقصيد الجزل خذها من قصير
نادرً مثل الخوي وافى الشبر
عبدالله الغزي
