قصيدة لشاعر البدارين
عبدالله بن عبدالعزيز محمد الغزي
من منطلق انّ التجارب راس مال
احكم على الرجال بعد التجربه
اما يجي في ماقفه مضرب مثال
والاّ يجي عكس المثال ومضربه
حقايقً ماهيب من نسج الخيال
لو قيل عذب الشعر دايم اكذبه
نويت اوردها على عد الجزال
وابعد عن الجربان وابله واجربه
اكره ماشوفه واسمعه راع الهزال
اموت لااعجبني ولاني معجبه
دام العرب مابين نازل وارتحال
الهزل يلقى مذهبً من مذهبه
والرجل يبغى منه في بعض الحوال
يبرك ويركي للثقيله منكبه
والا الردي اذا بغى نهج الرجال
عرق الردى عند الصمايل ينكبه
كان الرجل مايحتمل شيل الثقال
ماينفعه ماله وكرسي منصبه
لو كان يحسب من بني الً وال
وقت المواقف مايفيده منسبه
ياذيب جر الصوت في روس الطوال
وانا معك بجر صوتي واجذبه
خذني معك فالشامخات من الجبال
فكري من الواقع يعيش بذبذبه
مليت انا ياذيب من سود الليال
ومن عالمً نياتها متقلبه
كم لي اخايل بارق عرض الخيال
يلوح لكن ماش نو يسكبه
والزله اللي من كريمين السبال
حطيتها مابين قلبي وعصبه
قدام لا تاصل لهل قيلً وقال
ويفرح بها الشامت ويبلغ مطلبه
مانيب ملزومً على كثر الجدال
مكرمً دقني ووجهي وشنبه
عن كلمة تحمل على كم احتمال
لو كان فيها سم داب وعقربه
حنا جمال انشيل ماتشيل الجمال
لاصاب بعض الناس وهنً فركبه
واصدورنا فيها سعه راع الشمال
مانقفي الصاحب ونشذب بعربه
نحفظ حقوق اعمام واحقوق الخوال
ونحفظ حقوق الصاحب اللي نصحبه
واللي يدور صاحبً وافي خصال
يموت ماحصل رفيقً يكسبه
