قصيده رائعه رائعه لشاعر البدارين /
عبدالله بن عبدالعزيز محمد حمد الغزي
لصار بعض الناس كيفه زقاره
انا هوى بالي من الكيف فنجال
في ساعةً والليل خيم سماره
في وجنة الدنيا رسم حبة الخال
والجرح ولع ف المعاليق ناره
اشعل فتيل الزند ياخضر الامال
وتقادحت ف الراس مثل الشراره
هواجسً ما بين نازل ورحال
تارد لها تاره وتصدر بتاره
هاجوس نقاض ً وهاجوس فتال
واصد لي غاره واسلم لغاره
اصحي على فالً واغيّب على فال
واذب لي قاره واعدي بقاره
اجر لي موال من بعد موال
ابيع قافً راس ماله خساره
واشري لقافً فيه وقفاتً جزال
ولو كنت انا ابحث عن كلام الاثاره
حرام لاجرح عرق ويسيل شلال
لاحط لي في خد الايام شاره
وسمً يخلدني على مر الاجيال
حتى ولو ماني بصاحب اماره
اخذت قسمي غصب من بيض الافعال
واللاش لو هو من ملوك التجاره
محقور لو هو من رياجيل الاعمال
من لا يسوقه للمواجب نعاره
ميت ولو هو حي من بين الازوال
ومن لا يلامس وسط قلبه حراره
حرام قلبه بين الاضلاع ينشال
ياحي رجلً وسط راسه سطاره
يشوش لجل الطيب شوشات الابطال
خطو الولد لصار مابه نزاره
يضيع حقه بين عمال بطّال
والرجل ب فعاله يحدد مساره
اما يجي رجالً او شبه رجال
وان كان راسي ماحفظت اعتباره
حرام مالبس من على راسي عقال
عبدالله الغزي
