قصيدة جميله لشاعر البدارين /
عبدالله بن عبدالعزيز محمد حمد الغزي
ناحت على الغصن ورقا ياالجروح الجداد
والبرق شامي ولحٌظ العين يمه سرا
والليل سدّل جناحه ياجناح الهجاد
والهجس تحت الظلوع العوج باع وشرا
ادله النفس لا ذعذع نسيم البراد
وان قلت جرحي برا لله جرحي برا
انادم المسبحه وانثر حروف المداد
لين الورق من حنينه حنت المحبرا
كني من الليل مااعرف غيرلون السواد
وكني من الدرب مااعرف غير طلعت كرا
على سنام الزمن شديت كور الشداد
لاخمني هاجسي والا طرالي طرا
ايامً اطرب لها وايام تبغى جهاد
وايام صلفه ولا يذري معاها ذرا
اسوق رجلي مع اصروف الليالي سناد
اموت واحيا ولا ارجع في طريقي ورا
حرام ماهين راسي لو كليت الكداد
والعفن مهيون راسه لو عليه زرا
الله ولا حاجةً من كف ظفرً جواد
والموت من حاجة السامج عديم القرا
الكل جرحً دوى ولكل جرحً ضماد
الاّ الكرامه تموت وجرحها مابرا
وش خانة الدلة الصفراء بليا قناد
لو كان يبرالها العنبر مع المبخرا
اما قدحت المعاني مثل قدح الزناد
والا دفنت المعاني تحت خد الثرا
الحر يشره على الجزله نهار الهداد
والعنقرا ماتطيح الا على عنقرا
شباب نار الظفر ياطى مشب الرماد
هبّاب ريحً نهار البيع والمشترا
والا ردي الروابع دم قلبه جماد
كفه على كسب ناموس الفخر ماضرا
يبقى المشبب عزيز يفوح راسه عناد
مايكتسي ف المذله لو يعيش ف عرا
عبدالله الغزي
